الليل روّح والدموع أربع أربع ياللعجب منك وعليك ارجع اشكيك

ياما عليك العين بالدمع تدمع وياما تصنّعْت الرضا لجل اراضيك

وياما ترجيت الوصل وأنت تقطع وخانتني عيوني إلى حلّ طاريك

قلها يكون الياس لي منك مقْنع تعبَتْ عيوني من رجاك وترجيك

باكر يقولون العرب شمس تطلع ولك يتضح ما اخفوه ناس ٍ حواليك

الشاهد الله فيك ما اوحي ولا أسمع وما اطيع ناس ٍ ياحبيبي حكوا فيك

غلاك عندي من غلا غيرك ارفع وابعد من انجوم السما كيف ماغليك!!

والله مامن حكم الأقدار مجزع لو راح عمري بين حيره وتشكيك

مالي بغيرك من هوى الغيد مطمع ماشفت بالدنيا جميل ٍ يحاليك