أحدْ يبني بدنياه ويهدِّي بغيت أصبر ولكن باح سدِّي

عجايب هالزمان الله يكافي طويلة مالها بالكون حدِّي

إلى بَرَّقتْ فيها ضاق صدري وش آخذ ويش أخلِّي ويش أعدِّي

أنا في خاطري كلمة خفيه ابظهرها ولو ماهوب ودِّي

ولا أحد يستشك إنّه هدفها وانا ماقلتها قصدي تحدِّي

أحد يخطي وهو ماهوب يدري يحسبه تايه الراي.. متقدِّي

وأحد ينطحك لاجاله بحاجه ولامنّه قضاها عنك صدِّي

واحد يلعب على الحبلين دايم ضعيفٍ لا يجيب ولا يودِّي

وناس ٍ ماتفيد بها الجمايل تراهم مابهم مخلوف كدِّي

وانا منهم بري والشاهد الله وطرف العين فيهم مايلدِّي

جليس السو ماهو صاحبٍ لي أنا ضدِّه وهو خصمي وضدِّي

إلى جا.. قلت يقعد مثل غيره والى أقفى قلت جعله مايردِّي

أنا ويّاه مانصلح بديره إلى منه نزل فيها نشدِّي

يدوِّرْ له من العربان مثله على قدّه وأنا ماهوب قتدِّي

إلى جاملت ولياها مصيبه وإلى صرّحت قالوا مستبدِّي

ابصبر مثل صبر أيوب لكن بطول الوقت ماني مستعدِّي

وعرف الطيبين أكبر تجاره تراها كل يوم ٍ تستجدِّي

مشاهدهم على عز ومعزّه تريح خاطرك وأنت متعدِّي

وجليس الخير يضحك له حجاجي واعدّه مثل أخوي وصلب جدِّي